|
Un proxecto de investigación europeo desenvolverá a nova xeración de TV por Internet |
 |
 |
|
Venres, 29 Febreiro 2008 17:49 |
 Un consorcio europeo de 21 socios que inclúe a emisoras de televisión e centros de investigación recibiu unha subvención de 19 millóns de euros da UE para investigar novas formas de televisión por Internet.
O proxecto P2P-Next explorará aplicacións P2P («Peer-to-Peer» ou de punto a punto) durante os próximos catro anos, co obxecto de desenvolver un sistema de transmisión de TV por Internet de «próxima xeración» baseado en P2P e na interacción social.
A tecnoloxía Peer-to-Peer ofrece unha alternativa á arquitectura tradicional cliente/servidor das redes informáticas. Cada computador participante (ou peer), ao utilizar as redes de banda ancha existentes, funciona á vez como cliente e como servidor para unha aplicación específica. Unha rede P2P permite compartir arquivos ou fluxos de contido con contidos de datos, son e imaxe.
«Estamos construíndo un sistema peer-to-peer legal de plataforma múltiple, baseado en software libre e de fonte aberta», afirmou George Wright, Produtor Executivo da Unidade de Desenvolvemento Rápido da BBC.
O sistema baséase en Tribler, unha tecnoloxía central desenvolvida pola Universidade Técnica de Delft. «Dispomos de financiamento para os próximos catro anos para mellorar a tecnoloxía Tribler, cubrindo o fluxo de P2P en vivo, unha interfaz de usuario mellorada, con recomendacións incorporadas de preferencias e moito máis», engadiu G. Wright no seu blog.
Potencialmente, esta tecnoloxía podería construírse sobre servizos de VOD («Vídeo on Demand» ou televisión á carta), e xa hai plans para probar o sistema en transmisións importantes nunha ampla gama de aparellos de consumo.
O proxecto ten un enfoque aberto no relacionado co intercambio de resultados, e entre os seus plans está o facer dispoñible toda a tecnoloxía de software central como código aberto coa esperanza de posibilitar a creación de novos modelos empresariais. Por outra banda, P2P-Next intentará abordar varias cuestións pendentes relacionadas coa transmisión de contido por Internet, como cuestións técnicas, xurídicas, normativas, de seguridade, empresariais e comerciais.
Os socios do proxecto son a BBC (Corporación Británica de Difusión), a Universidade Técnica de Delft, a Unión Europea de Radiodifusión, a Universidade de Lancaster, Markenfilm, Pioneer Digital Design Centre Ltd., e o Centro de Investigación Técnica VTT de Finlandia.
Para obtener máis información, consulte:
www.p2p-next.org
Ler noticia na web de Cordis
|
